MANIAC MANSION DELUXE - EN ESPERANTO
:.: Klasika komputila ludo nun disponebla en Esperanto
Antaŭ iom pli ol 15 jaroj, estis lanĉita la ludo Maniac Mansion
("freneza domo"), kiu popularigis novan ludstilon kaj arigis legion da
fanoj ĉirkaŭ la mondo. Pasintjare, internacia volontula skipo relanĉis
la ludon, nun kun pli ellaborita grafiko kaj rulebla en modernaj
komputiloj, "Maniac Mansion Deluxe". Intertempe, pli ol 400.000
personoj jam elŝutis la novan version (senpagan), kaj kiu estas ade
tradukata en novajn lingvojn: nun, ĝi estas disponebla ankaŭ en
Esperanto!
En MM, la ludanto interagas kun roluloj kaj objektoj, kadre de pluraj
malgrandaj sinsekvaj enigmoj, kiuj devas esti kohere solvitaj cele al
la fina tasko: savi la koramikinon de la ĉefa rolulo, enkarcerigitan de
freneza sciencisto. Oni gvidas skipon de tri studentoj tra lia domego,
interagante per komandoj ("prenu", "malfermu", "fermu", "puŝu", ktp)
kaj dialogoj, kiuj donas indikojn pri la solvo de la enigmoj. Vi
eltrovos ke ĉiu el la sep elekteblaj junuloj havas specialajn lertojn,
talentojn kaj malfortojn, kaj ĉiu el la frenezaj loĝantoj de la domo
havas celojn kaj dezirojn kiuj povos helpi aŭ bloki vian skipon,
depende de kiel vi rilatas al ili. La historio - kaj via alirmaniero
por plenumi la celon - estos malsamaj laŭ la knaboj kiujn vi elektas
kaj kiel vi interagas kun la personoj kaj aĵoj en la domego... Longaj
horoj da alloga cerbumado atendas vin! ;-)
Pro la ampleksa teksta interagado sur grafika interfaco, la ludo estas
plaĉa rimedo por praktiki lingvajn talentojn. Ĝi estas bona amuzaĵo kaj
por progresintoj, kaj por progresantoj; la grafika interagado ebligas
ke eĉ komencantoj ĝuu la ludon, samtempe ĉerpante sufiĉe ampleksan
vortprovizon.
======================================
# ELŜUTO
La paĝaro de la skipo, "LucasFan Games", troviĝas ĉe:
http://www.lucasfangames.de
Iru al "Our Games", kaj poste elektu "Download" sub "Maniac Mansion Deluxe".
Alternativa vojo por elŝuto de la ludo:
http://www.filefront.com/?filepath=/Adventureserver/fanadventures/mmd14setup.exe
> Se vi eventuale ricevas la ligilojn fuŝitaj: ili ankaŭ estas
troveblaj ĉe mia blogejo/fotejo, krom kelkaj ekranfotoj de la ludo:
http://jimes.multiply.com
---
# INSTALADO
La ludo estas instalebla sub Vindozo (pri rulado sub Linukso vidu pli
malsupre). Post elŝuto, sufiĉas ruli la dosieron kaj elekti la
instaldosierujon. Por lanĉi la ludon, fine musklaku sur la ikonon
kreitan.
---
# AGORDOJ
Post la ekrulo, malfermiĝas menuo. Elektu unue "Readme", kaj legu pri
la klavaraj komandoj (klaku sur la flageto por Esperanta versio).
Sekve, klaku sur "Configuration". Elektu "Esperanto translation" ĉe
"Game Language", kaj fine klaku sur "Save and run". Bonan ludadon! ;-)
---
# LINUKSO
Mi sukcesis ruli la ludon per XWine. Unue estas necese ekhavi la
malpakitan ludon (la dosiero ĉe LucasFan Games estas vindoza
instalilo); mi disponigis zip-dosieron kun la "malpakita" ludo ĉe mia
Yahoo-Briefcase:
http://briefcase.yahoo.com/jimesvm (id/pasvorto: iuajn/pasvorto)
La dosiero nomiĝas MMD1.4-XWine.zip.
Maldensigu la zip-dosieron (ĝi enhavas ankaŭ klarigojn pri la ludo en
html). Startu Wine kaj en ties grafikaj agordoj elektu ekrandenson
640x480 kaj 256 kolorojn antaŭ ol ruli la dosieron de la ludo,
Maniac.exe. Krome, la dosiero acsetup.cfg enhavas la agordojn de la
ludo jam faritajn: Esperanta traduko, ekrandenso 640x400 kaj
muziko/sonoj ŝaltitaj (necesas midi-subteno). Se tiu ekrandenso
rezultas peza en via komputilo, redaktu la luddosieron acsetup.cfg kaj
ŝanĝu "screenres" al 0 por ruli per 320x200 (screenres=1 signifas
640x400).
Pri alia maniero kiel ruli la ludon sub Linukso, anglalingve, kontrolu: http://drevil.warpcore.org/ags/
Maniac Mansion Deluxe estis kreita uzante la programon "Adventure Game
Studio", kaj estas necese instali linuksan version de ties motoro por
rekte ruli ĝin. Mi tamen ne sukcesis, ĉar ŝajnas ke la ludo implementas
funkciojn ankoraŭ ne disponeblajn en la linuksa portaĵo, laŭ la
erarmesaĝo ricevita.
======================================
Laste: la skipestro de la projekto "Maniac Mansion Deluxe", la germano
Sascha Borisow (kaŝnomo "LucasFan"), estis tre malferma kaj helpema pri
la esperantigo de la ludo (ekzemple ĉe la strebo por la subteno de la
supersignoj). Gratulleterojn (prefere germane aŭ angle) se eble sendu
al li ĉe:
MMDeluxe [ĉe] gmx.net
======================================
Bonan ludadon!
Jimes Vasco Milanez
